இன்று (12.03.2021), திராவிட முன்னேற்றக் கழகத்தின் தலைவர் மு.க.ஸ்டாலின் அவர்கள், கோபாலபுரம் இல்லத்தில் உள்ள முத்தமிழறிஞர் கலைஞர் அவர்களின் திருவுருவப்படம், மெரீனா கடற்கரையில் உள்ள பேரறிஞர் அண்ணா மற்றும் முத்தமிழறிஞர் கலைஞர் ஆகியோரது நினைவிடங்களில் மரியாதை செலுத்தி விட்டு, அண்ணா அறிவாலயத்திற்கு வந்து எதிர்வரும் தமிழ்நாடு சட்டப்பேரவைத் தேர்தலில் போட்டியிடும் கழக வேட்பாளர்களின் பட்டியலை வெளியிட்டார்.

ஊடகத்துறை நண்பர்ளுக்கும், அவர்கள் வழியாக தமிழக மக்கள் அனைவருக்கும் வணக்கம்!

நடைபெற இருக்கிற தமிழ்நாடு பதினாறாவது சட்டப்பேரவைத் தேர்தலில் திராவிட முன்னேற்றக் கழகத்தின் சார்பில் போட்டியிடும் வெற்றி வேட்பாளர்கள் பட்டியலை உங்கள் முன்னால் வெளியிடுவதில் நான் பெருமைப்படுகிறேன்!

திராவிட முன்னேற்றக் கழகம் தலைமையிலான மதச்சார்பற்ற முற்போக்குக் கூட்டணி என்பது அரசியல் கூட்டணி அல்ல; ஏன், தேர்தல் காலக் கூட்டணியும் அல்ல; இது ஒரு கொள்கைக் கூட்டணி என்பதை தொடர்ந்து நான் சொல்லி வருகிறேன்!

இத்தகைய கொள்கை நட்பால் உருவான கூட்டணி சார்பில் தொகுதிகளின் எண்ணிக்கை கணக்கிடப்பட்டது. அதன்பிறகு என்னென்ன தொகுதிகள் என அடையாளம் காணப்பட்டது. இத்தகைய பணிகள் நேற்றுடன் முடிவடைந்தது.

அந்த அடிப்படையில் தமிழக சட்டப்பேரவையின் 234 தொகுதிகளில், திராவிட முன்னேற்றக் கழக வேட்பாளர்கள் 173 தொகுதிகளில் போட்டியிடுகிறார்கள். 61 தொகுதிகளை தோழமைக் கட்சிகளுடன் பகிர்ந்து கொண்டிருக்கிறோம்.

மொத்தமுள்ள 234 தொகுதிகளில் கட்சிகளின் வாரியாக போட்டியிடும் தொகுதிகளின் எண்ணிக்கையை மட்டும் முதலில் நான் அறிவிக்கிறேன்.

* திராவிட முன்னேற்றக் கழகம் - 173 தொகுதிகள்

* காங்கிரஸ் கட்சி   - 25 தொகுதிகள்

* மறுமலர்ச்சி திராவிட முன்னேற்றக் கழகம் - 6 தொகுதிகள்

* மார்க்சிஸ்ட் கம்யூனிஸ்ட் கட்சி - 6 தொகுதிகள்

* இந்தியக் கம்யூனிஸ்ட் கட்சி - 6 தொகுதிகள்

* விடுதலைச் சிறுத்தைகள் கட்சி - 6 தொகுதிகள்

* இந்திய யூனியன் முஸ்லீம் லீக் கட்சி - 3 தொகுதிகள்

* கொங்குநாடு மக்கள் தேசியக் கட்சி - 3 தொகுதிகள்

* மனிதநேய மக்கள் கட்சி - 2 தொகுதிகள்

* தமிழக வாழ்வுரிமைக் கட்சி - 1 தொகுதி

* அகில இந்திய பார்வர்டு பிளாக் - 1 தொகுதி

* ஆதித்தமிழர் பேரவை - 1 தொகுதி

* மக்கள் விடுதலைக் கட்சி - 1 தொகுதி

- என எங்களுக்குள் ஒப்பந்தம் இறுதி செய்யப்பட்டுள்ளது.

இதில் மறுமலர்ச்சி திராவிட முன்னேற்றக் கழகம், கொங்குநாடு மக்கள் கட்சி, மனிதநேய மக்கள் கட்சி ஒரு இடம், தமிழக வாழ்வுரிமைக் கட்சி, அகில இந்திய பார்வர்டு பிளாக், ஆதித்தமிழர் பேரவை, மக்கள் விடுதலைக் கட்சி - ஆகிய தோழமைக் கட்சிகள் வெற்றிச் சின்னமாம் உதயசூரியன் சின்னத்திலேயே போட்டியிடுகிறார்கள்.

அந்த அடிப்படையில் பார்த்தால் தமிழ்ச் சமுதாயத்தின் ஒளிவிளக்காக இருக்கக் கூடிய பேரறிஞர் அண்ணா அவர்களின் சின்னமாம், முத்தமிழறிஞர் கலைஞர் அவர்களின் சின்னமாம் உதயசூரியன் 187 தொகுதிகளில் களம் காண்கிறது என்பதையும் உங்களுடன் பகிர்ந்து கொள்ள விரும்புகிறேன்.

பத்தாண்டு காலமாக பாழ்பட்டு நிற்கும் தமிழகத்துக்கு புதிய விடியல் காட்டப் போகும் இந்த தேர்தல் களத்தில் முழு நம்பிக்கையோடு கழகம் களம் காண்கிறது என்பதை முன்னுரையாகச் சொல்லி திராவிட முன்னேற்றக் கழகத்தின் வெற்றி வேட்பாளர் பட்டியலை நான் வெளியிடுகிறேன். இது வேட்பாளர் பட்டியல் மட்டுமல்ல, வெற்றி பெறுவோர் பட்டியல்!

 

 

 

மறுபடியும் சொல்கிறேன். இது வேட்பாளர் பட்டியல் மட்டுமல்ல, வெற்றி பெறுவோர் பட்டியல்!

1971 தேர்தலில் 184 இடங்களை உதயசூரியன் சின்னத்தில் கைப்பற்றி மகத்தான சாதனையை தலைவர் கலைஞர் அவர்கள் செய்து காட்டினார்கள். அந்த சாதனையை தமிழ்நாட்டின் எந்த முதலமைச்சரும் இதுவரை முறியடிக்கவில்லை.

தி.மு.க.வின் சாதனையை தி.மு.க.தான் வெல்ல முடியும் என்ற எண்ணத்துடன்தான் இந்தத் தேர்தல் களத்தில் நாங்கள் இறங்கி இருக்கிறோம். 187 வேட்பாளர்கள் உதயசூரியன் சின்னத்தில் போட்டியிடுகிறார்கள். அனைவரும் வெற்றி பெறுவார்கள். தோழமைக் கட்சிகள் போட்டி போடும் தொகுதிகள் உட்பட 234 தொகுதிகளிலும் எங்கள் கூட்டணியின் வேட்பாளர்கள் வெற்றி பெறுவார்கள் என்பது உண்மை; அதனை நிரூபித்துக் காட்டுவோம்.

234 தொகுதியிலும் நிற்பது கழகம் என்று அனைவரும் நினைக்க வேண்டும். கழகத் தோழர்களுக்கும் உடன்பிறப்புகளுக்கும் நான் சொல்லிக் கொள்வது - போட்டியிடுபவர் முத்தமிழறிஞர் கலைஞர்! என்பதை மட்டும் மனதில் கொண்டு அனைவரும் செயல்பட வேண்டும். கழக ஆட்சியை அமைப்போம் என்பது ஒன்றே உங்களது சிந்தனையாக இருக்க வேண்டும் என்று வேண்டிக் கேட்டுக் கொள்கிறேன்.

நடக்க இருப்பது ஆட்சி மாற்றத்துக்கான தேர்தல் மட்டுமல்ல, ஜனநாயகப் போர். இந்தப் போரில் மக்களோடு இணைந்து ஊடகங்களும் தங்களது நெறிமுறைகளோடு செயல்பட்டு தமிழகத்தின் எதிர்காலத்துக்கு தங்கள் பங்களிப்பை செய்ய வேண்டும் என்று அன்போடு கேட்டுக் கொள்கிறேன்.

கழகத் தலைவர்: அதுதான் சொன்னேனே! மத்திய அரசுக்கு அடிமையாக இருக்கும் ஆட்சி, இதை ஆட்டிப்படைக்கிற பா.ஜ.க ஆட்சி. இரண்டுக்கும் முடிவு கட்ட வேண்டும்.

கழகத் தலைவர்: நாளை மாலைக்குள் வெளியிடப்படும்.

கழகத் தலைவர்: நீங்கள் எப்படி சாதாரணமானவர் என்று சொல்கிறீர்கள்? அவர் சாதாரணமானவராக இருக்கலாம். ஆனால் வெற்றி பெறும் வேட்பாளர்.

கழகத் தலைவர்: கூட்டணி கட்சிகள் அதிகம். நாங்கள் மிகவும் சுமுகமாக, எந்தப் பிரச்சினையும் இல்லாமல் முடிவு செய்துள்ளோம்; ஒரே இடத்தை பல கட்சிகள் கேட்பார்கள் அதையெல்லாம் பேசி சரிசெய்ய காலதாமதமாகியது. எந்த தகராறும் இல்லை. எந்த பிரச்சினையும் இல்லை. நேற்று 12 மணி வரைக்கும் இருந்து அதை முடித்துவிட்டு தான் வந்திருக்கிறோம். அதை முடித்ததற்கு பிறகு தான் வேட்பாளர் பட்டியலை வெளியிட்டேன்.

 கழகத் தலைவர்: இன்றிலிருந்து ஆரம்பிக்கிறது. அந்தந்த வேட்பாளர் சூழ்நிலைக்கு தகுந்தாற்போல் செய்ய வேண்டியது தான். ஏன்னென்றால் இன்றைக்கு எல்லோரும் ஊருக்குச் செல்ல வேண்டும். அதற்குரிய ஆவணங்கள் எல்லாம் தயார் செய்ய வேண்டும். அவற்றை எல்லாம் தயாரித்த பின்னர் தாக்கல் செய்வார்கள்.

கழகத் தலைவர்: நான் 15-ஆம் தேதி வேட்புமனு தாக்கல் செய்ய இருக்கிறேன். அன்று மாலையில் இருந்து பிரச்சாரத்தைத் தொடங்கலாம் என்று முடிவு செய்திருக்கிறேன்.